مریم نواز کو عمران فوبیاہوگیا ہے، شاہ محمود قریشی

وزیر خارجہ شاہ محمو د قریشی کا کہنا ہے کہ  حکومت سینیٹ انتخابات میں شفافیت قائم رکھنے اورووٹوں کی خریدو فروخت ہمیشہ کیلئے ختم کرنے کیلئے اوپن بیلٹ انتخابات چاہتی ہے، ہم چاہتے ہیں ایسا شفاف نظام لایا جائے جس میں کرپشن اور خریدوفروخت کے بازار بند ہو جائیں۔

 شاہ محمود قریشی کا کہنا تھا کہ   پی پی اور ن لیگ کے قول و فعل میں تضاد ہے، دونوں جماعتوں نے چارٹرآف ڈیموکریسی کی شق 23 میں لکھا تھا کہ سینیٹ انتخابات اوپن بیلٹ کے ذریعے کروائے جائیں گے، اب دونوں جماعتیں اپنے قول سے پیچھے ہٹ چکی ہیں۔

وفاقی وزیر کا کہنا تھا کہ  ہم نے اس مقصد کیلئے سپریم کورٹ میں درخواست دائر کی ہے کہ آئینی تشریح کی جائے، قانون سازی کیلئے ہمارے پاس دو تہائی اکثریت نہیں ہے، پاکستان کی تاریخ گواہ ہے سینیٹ کے سابقہ انتخابات میں تحریک انصاف نے شکایت ملنے پر اپنے 20 اراکین صوبائی اسمبلی کو پارٹی سے بے دخل کردیا تھا۔

شاہ محمود قریشی نے کہا کہ  وزیراعظم عمران خان کا واضح اعلان ہے کہ کرپشن پر کوئی سمجھوتہ نہیں ہوگا، پی ڈی ایم ایک طرف حکومت کو جعلی حکومت کہتی ہے اور دوسری طرف سینیٹ انتخابات میں حصہ لیکر اسی جعلی اسمبلی میں جاناچاہتی ہے۔

وزیر خارجہ شاہ محمود قریشی کا کہنا تھا کہ   مریم نواز کو عمران فوبیاہوگیا ہے، پی ڈی ایم جتنا مرضی لانگ مارچ کر لےجتنا مرضی احتجاج کرلے لٹیروں سے مفاہمت نہیں ہو سکتی، نواز شریف نے مودی کو شادی پر بلا کر گلے لگایا اور کشمیریوں سے بغاوت کی۔ کسی بھی صورت میں مسئلہ کشمیر کو حل کرنا چاہتے ہیں۔