مالی سال 2021-22: زرعی شعبے کے لیے 12 ارب روپے مختص

تفصیلات کے مطابق  وفاقی بجٹ میں  زرعی شعبے کے لیے 12 ارب روپے  رکھے گئے ہیں ، جبکہ  ٹڈی دل اور فوڈ سیکیورٹی پراجیکٹ کے لیے 1 ارب روپے مختص کرنے کی تجویز ہے۔چاول، گندم، کپاس، گنے اور دالوں کی پیداوار بڑھانے کے لیے 2 ارب روپے مختص کرنے کی تجویز ہے۔  زیتون کی کاشت بڑھانے کے لیے 1 ارب روپے مختص کرنے کی تجویز پیش کی گئی ہے۔

وزیر خزانہ شوکت ترین نے بجٹ تقریر میں کہا کہ ، گندم، گنے، چاول کی پیداوار میں اضافہ ہوا ہے،  زرعی اجناس کی درآمد کی وجہ 2019 میں کم پیداوار تھی، کسانوں کو 31سو ارب روپے آمدن ہوئی جو گزشتہ سال 23 سو ارب روپے تھے ۔ زرعی اجناس کے گوداموں کو ٹیکس چھوٹ دینے کی تجویز دی گئی ہے۔شوکت ترین نے کہا کہ پاکستان غذائی اجناس میں خسارے کا ملک بن گیا ہے، عالمی مارکیٹ میں غذائی اجناس بلند ترین سطح پر ہے۔صوبوں کے تعاون سے زرعی پیداوار میں اضافہ اور فوڈ سیکیورٹی یقینی بنانے کے لیے جامع پلان ترتیب دیا گیا ہے۔

واضح رہے کہ وزیر خزانہ شوکت ترین  نے  مالی سال 2021-22  کیلئے 8ہزار 487 ارب ڈالر کا بجٹ پیش کیا ہے ۔  اس سے قبل وزیراعظم عمران خان کی زیر صدارت وفاقی کابینہ اجلاس ہو ا جس میں بجٹ 2021-22 کی منظوری  دی گئی ۔