محکمہ ریلوے کا 20 سے زائد ٹرینیں آؤٹ سورس کرنے کا فیصلہ

محکمہ ریلوے نے ملک میں جاری ٹرینوں کو پرائیویٹ کرنے کا فیصلہ کر لیا۔ پرائیویٹ کی جانے والی ٹرینوں میں منافع بخش ٹرینیں بھی شامل ہیں۔ 
ذرائع کے مطابق پرائیویٹ کی جانے والی ٹرینوں میں نیازی ایکسپریس، گرین لائن اور  عوامی ایکسپریس سمیت 20 سے زائد ٹرینیں شامل ہیں۔ 
محکمہ ریلوے کے مطابق ٹرینیں پبلک پرائیویٹ پارٹنر شپ کے تحت چلیں گی، جس کے لیے جلد ہی ریلوے کی جانب سے ٹینڈرز جاری کیے جائیں گے۔ 
حکومت نے دعویٰ کیا کہ ٹرینوں کو پرائیویٹ کرنے کا فیصلہ عوام کو بہتر سفری سہولیات مہیا کرنے کے لیے کیا گیا ہے۔ 
واضح رہے کہ کچھ دن قبل محکمہ ریلوے نےٹرینوں سے 25 ارب سے زائد آمدنی حاصل ہونے کا دعویٰ کیا تھا۔ ٹرینوں کو پرائیویٹ کرنے کے حالیہ فیصلے نے ریلوے کی کمائی کے حکومتی دعوؤں پر سوالات اٹھا دیے ہیں۔