پاکستان میں سونے کی قیمتیں ریکارڈ سطح پر پہنچ گئیں

سونا خریدنے والوں کےلئے بری خبر، پاکستان میں سونے کی قیمتیں ریکارڈ سطح پر پہنچ گئیں۔

مقامی صرافہ مارکیٹوں میں بھی سونے کی قیمتیں تاریخ کی نئی بلند ترین سطح پر پہنچ گئی ہیں، جس کے نتیجے میں 24 قیراط کے حامل فی تولہ سونے کی قیمت 1100روپے کے اضافے سے 2 لاکھ 73 ہزار روپے کی نئی بلند ترین سطح پر آگئی۔

اسی طرح  فی 10 گرام سونے کی قیمت بھی 943روپے کے اضافے سے 2 لاکھ 34 ہزار 53 روپے پر پہنچ گئی۔

سونے کی قیمتوں میں مسلسل اضافے کے برعکس ملک میں فی تولہ چاندی کی قیمت بغیر کسی تبدیلی کے 2950روپے اور فی 10 گرام چاندی کی قیمت بھی بغیر کسی تبدیلی کے 2529.14روپے کی سطح پر مستحکم ہے۔

بین الاقوامی بلین مارکیٹ میں فی اونس سونے کی قیمت 11ڈالر کے اضافے سے 2628ڈالر کی نئی بلند ترین سطح پر آ گئی۔