اسلام آباد ہائیکورٹ کا عمران خان کے طبی معائنے  کیلئے میڈیکل بورڈ تشکیل دینے کا حکم

اسلام آباد ہائیکورٹ کے جسٹس میاں گل حسن اورنگزیب نے عمران خان کے طبی معائنے کے حوالے سے دائر کردہ درخواست پر سماعت کرتے ہوئے میڈیکل بورڈ کی تشکیل کا حکم دے دیا۔
اسلام آباد ہائیکورٹ نے اپنے فیصلے میں کہا کہ ایگزیکٹو ڈائریکٹر پمز بانی تحریک انصاف  کے طبی معائنےکیلئے بورڈ تشکیل دیں، بورڈ میں بانی پی ٹی آئی کے ذاتی معالج ڈاکٹر فیصل کو بھی شامل کیا جائے، ایگزیکٹو ڈائریکٹر پمز میڈیکل بورڈ تشکیل دےکررپورٹ رجسٹرار آفس میں جمع کرائیں۔  عدالتی  فیصلے میں مزید کہا گیا کہ آرڈر کی کاپی سپرنٹنڈنٹ اڈیالہ جیل کو بھی عملدرآمد کے لیے بھیجی جائے۔
اسلام آباد ہائیکورٹ نے اپنے حکم نامے میں لکھا کہ بانی پی ٹی آئی کی عمر 72 سال ہے،وہ سابق وزیراعظم اور انڈر ٹرائل قیدی ہیں، اڈیالہ جیل میں سیکیورٹی اقدامات کوالیفائیڈ ڈاکٹر کے بی کلاس قید کے چیک اَپ میں رکاوٹ نہیں ہو سکتے۔

عدالت نے بانی تحریک انصاف کی درخواست ہدایات کے ساتھ نمٹا دی۔
واضح رہے کہ بانی پی ٹی آئی نے کچھ روز قبل اپنے ذاتی معالجین سے میڈیکل چیک اپ کے لیے درخواست دائر کی تھی۔