اختر مینگل سمیت بی این پی کے دیگر رہنماوں کے خلاف دہشتگردی کا مقدمہ درج

بلوچستان نیشنل پارٹی (بی این پی ) مینگل گروپ کے سربراہ سردار اختر  مینگل سمیت پارٹی کے 6ارکان پر دہشت گردی کا مقدمہ درج کر لیا گیا،مقدمہ جوائنٹ سیکرٹری سینیٹ جمیل احمد کی مدعیت میں اسلام آباد تھانہ سیکریٹریٹ میں درج کیا گیا، جس میں دہشت گردی کی دفعہ بھی عائد کی گئی ہے۔

مقدمے کے متن کے مطابق سردار  اختر مینگل کے ساتھ دیگر 5 افراد نے مسلح ہوکر سینیٹ ہال میں زبردستی گھسنے کی کوشش کی، میرجہانزیب مینگل اور اختر نواز نے مسلح ہوکر سیکیورٹی اسٹاف کو دھکے دیے، ملزمان نے زبردستی سینیٹ ہال میں اسلحہ سمیت گھسنے کی کوشش کی۔

اس حوالے سے سردار اخترمینگل کا میڈیا سے گفتگو کرتے ہوئے کہنا تھا کہ مجھے خاتون سیکیورٹی اہلکار نے گیلری سے نکالا۔ جبکہ سینیٹ میں میرا اپنی پارٹی کے مغوی ارکان سے آمنا سامنا ہورہا تھا۔سردار اختر مینگل کا مزید کہنا تھا کہ  میں نے سب کی چوری پکڑی تو حکومتی وزرا کے پسینے نکل گئے۔

خیال رہے  کہ 26 ویں آئینی ترمیم کے موقع پرسردار اختر مینگل کو سینیٹ گیلری سے نکال دیا گیا تھا۔

واضح رہے کہ بلوچستان نیشنل پارٹی کے سینیٹر قاسم رونجھو اور نسیمہ احسان مبینہ منحرف ارکان میں شامل ہیں اور انہوں نے پارٹی کی ہدایات کے برخلاف آئینی ترمیم کے حق میں ووٹ دیا ہے، جس پر سردار اخترمینگل نے پارٹی کے دونوں سینیٹرز کو مستعفی ہونے کا حکم دیا۔