مریم نواز کی 5 نومبر کو لندن روانگی کا امکان

مسلم لیگ (ن) کے ذرائع کے مطابق  وزیراعلیٰ پنجاب مریم نواز کا منگل 5 نومبر کو لندن جانے کا امکان ہے اور وہ اپنے علاج کے لیے لندن جائیں گی۔

ذرائع کا  کہنا ہے کہ مریم نواز کافی عرصے سے گلے میں انفیکشن کا شکار ہیں ، وہ اپنے ذاتی معالج سے علاج کرائیں گی ، مریم نواز کا گلے میں انفیکشن کے باعث ڈاکٹرز کی ہدایت پر آپریشن کا بھی امکان ہے۔

ذرائع کا کہنا ہے کہ مریم نواز کا دورہ لندن ایک ہفتے پر محیط ہو گا، مریم نواز کا وزارت اعلیٰ کا منصب سنبھالنے کے بعد یہ پہلا غیر ملکی دورہ ہو گا، نواز شریف اور مریم نواز کا لندن سے اکٹھے وطن واپس آنے کا امکان ہے۔

واضح رہے کہ نواز شریف گزشتہ ماہ 26 اکتوبر کو لندن، امریکا اور یورپ کے دوروں پر روانہ ہوئے تھے۔ نواز شریف براستہ دبئی لندن پہنچے تھے اور کچھ روز قیام کے بعد امریکا چلے گئے تھے، امریکہ کا دورہ مکمل کرنے کے بعد وہ  واپس لندن پہنچ گئے ہیں۔