190 ملین پاؤنڈ ریفرنس میں بانی پی ٹی آئی کی سزا کے خلاف اپیل تیار

اسلام آباد:پاکستان تحریک انصاف نے190ملین پاؤنڈ ریفرنس میں سزا کے خلاف بانی پی ٹی آئی اور ان کی اہلیہ بشریٰ بی بی کی اپیل تیار کر لی گئی ہے۔
پی ٹی آئی ذرائع کے مطابق اپیل 21 جنوری کواسلام آباد ہائی کورٹ میں دائر کئے جانے کا امکان ہے ۔
 بیرسٹر سلمان صفدر اور خالد یوسف چوہدری ایڈووکیٹ بانی پی ٹی آئی اور بشریٰ بی بی کی جانب سے سزاؤں کیخلاف اپیل دائر کریں گے۔
دوسری جانب وکالت نامے مجرموں سے دستخط کرانے کیلئے اڈیالہ جیل حکام کے حوالے کر دئیے گئے ہیں ، جیل حکام وکالت نامے کل پیر کو وکلا کو واپس کریں گے۔
بشری بی بی کے وکیل خالد یوسف کا کہنا ہے کہ وکالت نامے جیل حکام نے لے لئے ہیں اور ہمیں اندر نہیں جانے دیا گیا۔
واضح رہےکہ  احتساب عدالت کی جانب سے القادر ٹرسٹ کیس میں بانی پی ٹی آئی کو 14 سال اور بشریٰ بی بی کو 7 سال قید کی سزا سنائی گئی ہے۔