مریم نواز کا سڑکوں اور صحت کے مراکز کی تعمیرات جلد مکمل کرنے کا حکم

وزیر اعلیٰ پنجاب مریم نواز نے پنجاب میں زیرتعمیر سڑکوں اور صحت کے مراکز کی تعمیرات جلد مکمل کرنے کے احکامات جاری کر دیئے۔

وزیر اعلیٰ پنجاب مریم نواز کی زیر صدارت خصوصی اجلاس ہوا۔ اجلاس میں پنجاب بھر میں جاری سڑکیں اور صحت کے ڈویلپمنٹ پراجیکٹس کا جائزہ لیا گیا۔

مریم نواز نے پنجاب کی سڑکوں کی تعمیر و مرمت مالی سال کے آخر تک مکمل کرنے اور تمام مراکز صحت کی تعمیر و بحالی کا پہلا فیز 30 جون تک مکمل کرنے کے احکامات جاری کر دیئے۔

وزیر اعلیٰ پنجاب کی دی گئی بریفنگ میں بتایا گیا کہ روڈ بحالی پروگرام کے تحت 462 منصوبوں کی منظوری ہوئی۔ اور 455 پر کام جاری ہے۔ روڈ بحالی پروگرام کے تحت تعمیر و بحالی کا 25 فیصد سے زائد کام مکمل ہو چکا ہے۔ روڈ بحالی پروگرام فیز ٹو کے تحت 72 اسکیموں کی منظوری ہوئی اور 67 پر کام جاری ہے۔ جبکہ روڈ بحالی پروگرام فیز ٹو کے منصوبے پر 24 فیصد سے زائد کام مکمل ہو چکا ہے۔

بریفنگ میں بتایا گیا کہ پنجاب بھر میں مراکز صحت کی تعمیروبحالی کا 75 فیصد کام مکمل ہو چکا ہے۔ اور پنجاب کے مختلف علاقوں میں 54 بنیادی مراکز صحت کی تعمیر و بحالی مکمل ہو گئی ہے۔ پنجاب بھر میں ایک ہزار 164 بنیادی مراکز صحت پر تعمیر و بحالی کا کام ہو رہا ہے۔

وزیر اعلیٰ پنجاب نے مراکز صحت کی تعمیر و بحالی کی بروقت تکمیل کی ہدایت کرتے ہوئے کہا کہ پنجاب بھر میں رابطہ سڑکوں کی بحالی اور مرمت سے لاکھوں شہری مستفید ہوں گے۔  کھیت تا منڈی سڑک کی تعمیر سے معاشی سرگرمیاں بھی بڑھیں گی۔ اور نئے ہیلتھ کلینک بننے سے دور دراز علاقوں کے عوام کو بہترین سہولتیں میسر ہوں گی۔

مریم نواز نے کہا کہ پہلی مرتبہ دیہات کے عوام کو شہروں کے اعلیٰ پرائیویٹ کلینکس کا ماحول ملے گا۔