ایران میں مارے گئے 8 پاکستانیوں کی لاشوں کو آج رات بہاولپور منتقل کیا جائے گا

ایران میں افسوسناک طور پر قتل ہونے والے 8 پاکستانی شہریوں کی میتوں کو آج رات خصوصی فوجی طیارے کے ذریعے بہاولپور منتقل کیا جائے گا۔

اس حوالے سے تمام تر انتظامات مکمل کر لیے گئے ہیں، یہ بات ایران میں تعینات پاکستانی سفیر مدثر ٹیپو نے اپنے بیان میں کہی۔

سفیر مدثر ٹیپو نے بتایا کہ وزیر اعظم، نائب وزیر اعظم، دفتر خارجہ، پاک فضائیہ اور دیگر تمام متعلقہ اداروں نے فوری ردِعمل دیا اور میتوں کی جلد از جلد وطن واپسی کے لیے بھرپور تعاون فراہم کیا۔

مدثر ٹیپو نے اس مشکل وقت میں بھرپور ساتھ دینے پر ایرانی حکام کا بھی شکریہ ادا کیا اور کہا کہ ایران کے معززین بھی آج رات ایئرپورٹ پر موجود ہوں گے تاکہ پاکستانی شہریوں کو الوداع کہہ سکیں۔

ان کا کہنا تھا کہ حکومتِ پاکستان کی اعلیٰ قیادت نے مرحومین کی تعظیم اور بروقت تدفین کو یقینی بنانے کے لیے فوجی طیارہ روانہ کرنے کا فیصلہ کیا ہے۔