ٹریفک پولیس کا ٹی 20 میچوں کے دوران لاہور کی تمام سڑکیں کھلی رکھنے کا اعلان

سی ٹی او لاہور سید حماد عابدنے جی این این کے نمائندے سے خصوصی گفتگو میں بتایا کہ کرکٹ میچز کے دوران کسی بھی روڈ کو ٹریفک کیلئے بند نہیں کیا جائے گا، مال روڈ، جیل روڈ، فیروزپور روڈ، مین بلیوارڈ روڈ گلبرگ پر معمول کے مطابق ٹریفک رواں دواں رہے گی، ایم ایم عالم روڈ، کینال روڈ پر بھی ٹریفک معمول کے مطابق رواں دواں رہے گی۔ 

سی ٹی او لاہور کا کہنا تھا کہ ٹیم کی نجی ہوٹل سے قذافی اسٹیڈیم منتقلی تک رکاوٹیں لگائیں جائیں گی، ٹیم کے اسٹیڈیم پہنچنے کے بعد تمام ٹریفک کو دوبارہ کھول دیا جائے گا،تاہم ٹیم موومنٹ کے دوران ٹریفک کی روانی کو برقرار رکھنے کیلئے اضافی نفری بھی تعینات کی جائے گی ، ان کا کہنا تھا کہ ایس پی ٹریفک سٹی ڈویژن  کی  سربراہی  میں 13 ڈی ایس پیز، 51سنیئروارڈنز تعینات ہونگے، جبکہ ٹریفک کو رواں دواں رکھنے کےلئے شہر بھر کی سڑکوں پر 535 وارڈنز تعینات ہونگے ، اس کے ساتھ ہی دیگر اضلاع سے آئے 135 وارڈنز بھی فرائض سرانجام دیں گے،انہوں نے مزید بتایا کہ رانگ پارکنگ کے خاتمے کیلئے 13 فوک لفٹرز، 02 بریک ڈاون  بھی تعینات کئے جائیں گے۔ 

واضح رہے کہ ٹیسٹ میچوں کے بعد پاکستان اور ساؤتھ افریقہ کے مابین تین ٹونٹی میچوں کی سیریز آج سے قذافی اسٹیڈیم لاہور میں شروع ہوگی، تینوں میچ قذافی اسٹیڈیم لاہور میں کھیلے جائیں گے۔قذافی اسٹیڈیم میں دونوں ٹیموں نے میچ سے ایک دن قبل پریکٹس کی جس کے دوران باؤلنگ، بلے بازی اور فیلڈنگ کی مشقیں کی گئیں۔