چین، امریکہ تصادم دونوں ممالک کے لئے تباہی کا باعث ہے،چینی صدر

خبر رساں ادارے اے ایف پی کے مطابق صدر جو بائیڈن نے عہدہ سنبھالنے کے بعد پہلی مرتبہ چینی صدر شی جنپنگ سے ٹیلی فونک رابطہ کیا ہے۔وائٹ ہاؤس کی جانب سے جاری کیے بیان میں کہا گیا ہے کہ بائیڈن نےہانگ کانگ میں چین کے کریک ڈاؤن ، سنکیانگ میں انسانی حقوق کی پامالی اور تائیوان کے ساتھ بڑھتی ہوئی سخت کارروائیوں کے بارے میں اپنے بنیادی خدشات پربات کی۔ 

بیان میں مزید کہا گیا کہ بائیڈن اور چینی صدرنےوبائی امراض کا مقابلہ کرنے کے ساتھ ساتھ آب و ہوا کے مشترکہ چیلنجز اور ہتھیاروں کے پھیلاؤ کو روکنے  پربھی تبادلہ خیال کیا، بائیڈن نے شمالی کوریا کو اپنے جوہری ہتھیار ترک کرنے کے لئے بیجنگ کے ساتھ تعاون  کی امریکی خواہش کا ذکرکیا۔ 

دوسری جانب غیر ملکی میڈیا رپورٹس کے مطابق چینی صدرشی جن پنگ نے جوبائیڈن سے گفتگومیں کہا کہ  چین اور امریکہ کے مابین محاذ آرائی ایک تباہی ہوگی اور دونوں  کو غلط فہمیوں سے بچنے کے لئے رابطوں کو دوبارہ قائم کرنا چاہئے۔انہوں نے کہاکہ تعاون ہی واحد انتخاب  ہےاور دونوں ممالک کو تنازعات کو تعمیری انداز میں حل کرنے کی ضرورت ہے۔

چینی صدرکا کہنا تھا کہ بیجنگ اور واشنگٹن کو ایک دوسرے کے ارادوں کو سمجھنے اور غلط فہمیوں سے بچنے کے لئے بات چیت کے لئے مختلف میکانزم کو دوبارہ تشکیل دینا چاہئے۔ان کا کہنا تھا کہ امید ہے امریکہ تائیوان ، ہانگ کانگ اور سنکیانگ سے متعلق معاملات کو محتاط طور پر سنبھالے گا ۔