پتنگ بازی کا خونی کھیل جاری، ڈور پھرنے سے 3 افراد زخمی

تفصیلات کے مطابق  جنرل ہسپتال کے سامنے دو افراد کو ڈور پھر گئی۔ریسکیو ذرائع کے  مطابق 8 سالہ بچے کو طبی امداد کے لیے چلڈرن ہسپتال منتقل کر دیا ہے،  جبکہ چودہ سالہ لڑکے کو موقع پر ہی طبی امداد فراہم کر دی گئی۔

دوسرے واقعہ میں  21سالہ نوجوان کو یادگار فلائی اور کے پاس ڈور پھر گئی۔ریسکیو ذرائع کا کہنا ہے کہ  ڈور چہرے اور ہاتھ کی انگلیوں پر پھری ہے۔

چند دن قبل کراچی صدر میں پتنگ کی ڈور پھرنے سے بچہ زخمی ہوگیا تھا، 7سالہ محمد حسنین ولد محمد ارتضیٰ صدر کے علاقے میں گلی میں کھیل رہا تھا کہ پتنگ کی ڈور اس کے گلےپر پھر گئی جس کے نتیجے میں وہ زخمی ہوگیا، علاقہ مکینوں نے بچے کو جناح اسپتال منتقل کیا جہاں اسے طبی امداد دی گئی۔

گزشتہ برس بھی ڈور پھرنے کے بہت سے واقعات سامنے آئے جس کے باعث لوگوں کی جانیں گئیں اور بہت سے افراد ڈور پھرنے کے واقعات میں زخمی بھی ہوئے۔19 اکتوبر 2020 کو  لاہور میں گلے پر ڈور پھرنے سے یونیورسٹی آف ہیلتھ سائنسز کا ملازم زخمی ہوگیا تھا، 28 سالہ نوجوان موٹرسائیکل پر دفتر جارہا تھا کہ والٹن کے علاقے میں گلے پر ڈور پھر گئی۔

وزیر اعلی پنجاب کا کہنا تھا کہ  پابندی کے باوجود پتنگ بازی کے واقعات ناقابل برداشت ہیں، پتنگ بازی کرنے والوں کے خلاف قانون کے تحت کارروائی کی جائے۔