جنوبی افریقہ کے بلے باز نےانڈر 19کرکٹ میں نئی تاریخ رقم کر دی

ہرارے: جنوبی افریقہ کے 18 سالہ نوجوان بیٹر جورچ وین شالک وک نے انڈر 19 ون ڈے کرکٹ میں نئی تاریخ رقم کر دی۔

تفصیلات کے مطابق پروٹیز بلے باز نے یوتھ ون ڈے انٹرنیشنل کی پہلی ڈبل سنچری بنا ڈالی، نوجوان بیٹر نے یہ اعزاز ہرارے میں جاری سہ ملکی سیریز کے افتتاحی میچ میں زمبابوے کے خلاف انڈر 19 ون ڈے میچ کھیلتے ہوئے حاصل کیا۔

جہاں انہوں نے محض 153 گیندوں پر 215 رنز کی شاندار اننگز کھیلی، ان کی اس طوفانی اننگز میں 19 چوکے اور 6 چھکے شامل تھے، یہ اس فارمیٹ میں کسی بھی بلے باز کی پہلی ڈبل سنچری ہے۔

جنوبی افریقہ کے نوجوان بیٹر سے قبل سب سے بڑا انفرادی اسکور سری لنکا کے ہسیتھابویا گوڈا کا تھا انہوں نے 2018ء میں 191 رنز بنائے تھے۔

جورچ وین کی شاندار ڈبل سنچری کی بدولت جنوبی افر یقہ نے زمبابو ے کو 385 رنز کا بڑا ہدف دیا، ہدف کے تعاقب میں زمبابوے کی انڈر 19 ٹیم 25 ویں اوور میں 107 رنز بنا کر آؤٹ ہوگئی۔