اسحاق ڈار کا ایرانی وزیر خارجہ سےٹیلیفونک رابطہ ،غزہ میں صہیونی جنگی جرائم کے فوری خاتمے پر زور

اسلام آباد: ایران اور پاکستان کے وزرائے خارجہ کے درمیان ٹیلیفونک رابطہ ہوا ہے، جس میں دونوں ممالک نے غزہ میں جاری صہیونی مظالم پر تشویش کا اظہار کرتے ہوئے جنگ بندی اور انسانی امداد کی فوری فراہمی کی ضرورت پر زور دیا۔

ایرانی خبر رساں ایجنسی مہر نیوز کے مطابق پاکستان اور ایران کے وزرائے خارجہ نے ٹیلیفون پر غزہ کی صورتحال پر گفتگو کی، جس دوران اسحاق ڈار اور عباس عراقچی نے غزہ میں اسر ائیلی مظالم پر تشویش کا اظہار کیا۔

ٹیلی فونک گفتگومیںایرانی وزیر خارجہ عباس عراقچی نے گفتگو کے دوران غزہ کے محاصرے اور صہیونی حکومت کی تباہ کن جارحیت کی طرف اشارہ کرتے ہوئے کہا کہ بین الاقوامی اور علاقائی اداروں خصوصا او آئی سی کو متحرک کرنا ضروری ہے تاکہ غزہ کے مظلوم عوام کو انسانی امداد پہنچائی جاسکے اور صہیونی مظالم کو روکا جاسکے۔

دوران گفتگو پاکستانی وزیر خارجہ اسحاق ڈار نے بھی غزہ کی بدترین انسانی صورت حال پر گہری تشویش کا اظہار کرتے ہوئے یقین دلایا کہ پاکستان، اسلامی جمہوریہ ایران اور دیگر اسلامی ممالک کے ساتھ مل کر انسانی امداد کی فراہمی اور سیاسی حل کی حمایت میں سرگرم کردار ادا کرنے کے لیے تیار ہے۔

خبر رساں ایجنسی کے مطابق دونوں وزرائے خارجہ نے اسلامی ممالک کے درمیان تعاون کو مضبوط بنانے اور صہیونی جارحیت کے خلاف مشترکہ اور منظم حکمت عملی کی ضرورت پر بھی زور دیا۔

 اس سے پہلے ایرانی وزیر خارجہ اور سعودی ہم منصب شہزادہ فیصل کے درمیان بھی ٹیلی فونک رابطہ ہوا جس میں خطےکی تازہ صورتحال اور غزہ میں انسانی بحران پر تبادلہ خیال کیا گیا۔