توشہ خانہ ٹو کیس: علیمہ خان نے وکیل کو جیل جانے سے روک دیا، سماعت ملتوی

تحریک انصاف کے بانی عمران خان کے خلاف توشہ خانہ ٹو کیس کی سماعت اڈیالہ جیل میں مقرر تھی، تاہم ان کے وکیل قوسین مفتی عدالت میں پیش نہ ہو سکے کیونکہ علیمہ خان نے انہیں جیل کے اندر جانے سے روک دیا۔

اڈیالہ جیل میں قائم عدالت میں اسپیشل جج سینٹرل صبح ساڑھے 10 بجے سے وکلاء کا انتظار کرتے رہے، مگر عمران خان کے وکیل عدم حاضری کے باعث سماعت مکمل نہ ہو سکی۔

ذرائع کے مطابق، علیمہ خان نے وکیل قوسین مفتی کو جیل کے داخلی دروازے پر روک لیا۔ ان کا مؤقف تھا کہ جب تک عمران خان کی فیملی، سینئر وکلاء سلمان اکرم راجہ اور علی ظفر کو اندر جانے کی اجازت نہیں دی جاتی، وکیل بھی عدالت میں پیش نہیں ہوں گے۔

عدالت اور پراسیکیوشن ٹیم تقریباً ساڑھے تین گھنٹے انتظار کے بعد واپس روانہ ہو گئی۔

سماعت کے دوران بانی پی ٹی آئی اور ان کی اہلیہ بشریٰ بی بی کی حاضری تو لگائی گئی، تاہم وکیل کی عدم موجودگی کی وجہ سے کیس کی کارروائی آگے نہ بڑھ سکی اور عدالت نے سماعت 29 جولائی تک ملتوی کر دی۔