عمران خان سیاست میں آنے سے پہلے چندہ لینے میرے پاس آتے تھے ، اسحاق ڈار کا دعوی ٰ

نائب وزیرِاعظم و وزیر خارجہ اسحاق ڈار نے کہا ہے کہ پاکستان تحریک انصاف (پی ٹی آئی) کے بانی چیئرمین عمران خان سیاست میں قدم رکھنے سے قبل ان سے چندہ لینے آیا کرتے تھے۔

امریکا میں تھنک ٹینک "اٹلانٹک کونسل" سے خطاب کرتے ہوئے اسحاق ڈار نے کہا کہ 2014 میں پی ٹی آئی کے 120 روزہ دھرنے نے ملکی معیشت کو شدید نقصان پہنچایا۔

انہوں نے کہا کہ اگر کوئی لیڈر مقبول ہو بھی جائے، تب بھی اُسے سکیورٹی تنصیبات پر حملے کی اجازت نہیں دی جا سکتی۔ عمران خان کو یہ حق نہیں پہنچتا کہ وہ ریاستی اداروں کے خلاف کارروائی کی قیادت کریں۔

اسحاق ڈار کا مزید کہنا تھا کہ سابق وزیر اعظم نواز شریف نے دہشت گردی کے خلاف کامیاب اقدامات کیے، تاہم بعد میں آنے والی حکومت، خصوصاً عمران خان کی سربراہی میں، نے کالعدم تحریک طالبان پاکستان (ٹی ٹی پی) کے لیے بارڈر کھول دیے اور 100 سے زائد شدت پسندوں کو رہا کیا۔

انہوں نے کہا کہ پی ٹی آئی حکومت کے فیصلوں کے باعث 30 سے 40 ہزار طالبان دوبارہ پاکستان میں داخل ہوئے اور دوبارہ متحرک ہو گئے۔ ان کے مطابق، یہ ایک انتہائی افسوسناک اور خطرناک اقدام تھا، کیونکہ دہشت گردوں کے لیے سرحدیں کھولنے کا مطلب ملکی سلامتی کو داؤ پر لگانا ہے۔