اداکارہ نشو بیگم کے داماد علی رضا دل کا دورہ پڑنے سے انتقال کر گئے

سینئر اداکارہ نشو بیگم کے چھوٹے داماد، علی رضا، 47 برس کی عمر میں دل کا دورہ پڑنے کے باعث انتقال کر گئے۔ یہ افسوسناک خبر خود نشو بیگم نے یوٹیوب پر جاری اپنے ولاگ کے ذریعے دی، جہاں وہ اپنے داماد کے ساتھ گزرے آخری لمحات کو یاد کرتے ہوئے آبدیدہ ہو گئیں۔

نشو بیگم کے مطابق، 22 جولائی کو علی رضا کی طبیعت خراب ہوئی اور وہ ہسپتال جا رہے تھے کہ راستے میں ان کے دل نے کام کرنا چھوڑ دیا۔ بدقسمتی سے، ہسپتال پہنچنے سے قبل ہی ان کا انتقال ہو گیا۔

اداکارہ نے بتایا کہ انتقال سے ایک رات قبل وہ اپنے داماد کے گھر گئی تھیں اور ان کے ساتھ خوشگوار وقت گزار کر واپس آئی تھیں۔ ان کا کہنا تھا کہ علی رضا مکمل طور پر صحت مند تھے اور انہیں کسی قسم کی بیماری لاحق نہ تھی، ان کی اچانک موت نے پورے خاندان کو صدمے سے دوچار کر دیا ہے۔

نشو بیگم نے داماد کو ایک بہترین انسان قرار دیا اور کہا کہ ان کی بیٹی، داماد کی والدہ اور ان کے بچے شدید صدمے میں ہیں۔ علی رضا کی نماز جنازہ میں شوبز انڈسٹری سے تعلق رکھنے والی معروف شخصیات ریمبو اور صاحبہ سمیت کئی دوستوں اور عزیزوں نے شرکت کی۔

آخر میں نشو بیگم نے مداحوں سے دعا کی اپیل کی کہ وہ ان کے داماد علی رضا کی مغفرت کے لیے دعا کریں۔