اترا کھنڈ: مندر میں بھگدڑ مچنے سے 6 افراد جاں بحق،متعدد زخمی

بھارت کی شمالی ریاست اتراکھنڈ کے شہر ہریدوار کے مندر میں بھگدڑ مچنے سے 6 افراد جاں بحق اور متعدد زخمی ہوگئے، جبکہ کئی کی حالت تشویشناک ہے۔

بھارتی میڈیا رپورٹس کے مطابق یہ افسوسناک واقعہ ریاست اتراکھنڈ کے شہر ہریدوار میں منسا دیوی کے مندر میں پیش آیا جہاں بھگدڑ مچنے  کے نتیجے میں 6 افراد جاں بحق اور متعدد زخمی ہوگئے، زخمیوں کو اسپتال منتقل کردیا گیا۔

 اتر کھنڈ پولیس اور ریسکیو ٹیمیں فلاحی کاموں میں مصروف ہیں اور 35 افراد کو طبی امداد کیلئے اسپتال منتقل کیا گیا ہے۔

بھارتی میڈیا کے مطابق ایک عینی شاہد نے بتایا کہ اچانک بڑی تعداد میں زائرین مندر میں جمع ہوگئے تھے، جب کچھ لوگوں نے رش سے باہر نکلنے کی کوشش کی تو بھگدڑ مچ گئی،انہوں نے کہا کہ کچھ لوگوں کے گرنے کی وجہ سے میرے ہاتھ میں بھی فریکچر ہوگیا۔

خیال رہے کہ بھارت میں مذہبی تہواروں کے دوران بھگدڑ اور بد انتظامی معمول ہے،رواں سال جنوری میںمہا کمبھ میلے میں بھگدڑ مچنے سے 30 افراد جاں بحق ہوئے تھے۔