قومی ائیر لائن کا 8 اگست سے اربعین کے لیے خصوصی فلائٹ آپریشن کا اعلان

اسلام آباد: قومی ایئرلائن (پی آئی اے) نے اربعین پر زائرین کے لیے خصوصی پروازیں چلانے کا اعلان کر دیا۔

ترجمان پی آئی اے کے مطابق قومی ایئرلائن کی 4 خصوصی پروازیں 8 تا 11 اگست کراچی سے روانہ ہوں گی، اور زائرین کے لیے نجف سے واپسی کے لیے 18 تا 21 اگست پروازیں شیڈول ہیں،پروازوں کے لیے ٹکٹوں کی فروخت شروع کر دی گئی ہے اور مارکیٹ کی ضرورت پر مزید پروازیں بھی شیڈول کی جائیں گی۔

پی آئی اے نے اربعین کے خصوصی فلائٹ آپریشن کے لیے فی مسافر کرایہ 675 ڈالر مقرر ہے۔

خیال رہے کہ اس سے قبل وزیر داخلہ محسن نقوی کا کہنا تھا کہ زیارت اربعین کے لیے عراق و ایران کے فضائی سفر کی اجازت ہو گی۔ تاہم زمینی راستے عراق ایران جانے کی اجازت نہیں ہو گی۔

ان کا کہنا تھا کہ اربعین کے لیے زمین راستہ بند کرنے کا فیصلہ وزارت خارجہ، بلوچستان حکومت اور سیکیورٹی اداروں کی باہمی مشاورت کے بعد کیا گیا، یہ فیصلہ عوام کے تحفط اور قومی سلامتی کے پیش نظر کیا گیا ہے۔

وزیر داخلہ کا کہنا تھا کہ وزیر اعظم شہباز شریف نے زائرین کے لیے پروازوں کی تعداد بڑھانے کی ہدایت کی ہے۔ اور پروازوں میں اضافہ کر کے زائرین کو زیادہ سہولت فراہم کی جائے گی۔