آزاد کشمیر: انسانوں پر حملے کرنے والا خونخوار تیندو فائرنگ سے ا ہلاک

آزاد کشمیر کے علاقے گہانی تنگ میں آبادی پر بار بار حملہ کرنے والے تیندوے کو فائرنگ کر کے ہلاک کر دیا گیا۔

تفصیلات کے مطابق یہ واقعہ لائن آف کنٹرول (ایل او سی) سے ملحق گاؤں میں پیش آیا، جہاں تیندوا مسلسل شہریوں پر حملے کر رہا تھا۔ بالآخر مقامی افراد کی اطلاع پر کارروائی کی گئی اور خونخوار جانور کو گولی مار کر ہلاک کر دیا گیا۔

ایس پی مرزا زاہد نے تصدیق کی ہے کہ مقامی لوگوں نے ہلاک شدہ تیندوے کی شناخت کی، جس سے یہ واضح ہوا کہ یہی جانور گزشتہ دنوں آبادی پر حملہ آور ہو رہا تھا۔

دو روز قبل اسی تیندوے نے ایک گھر سے 8 سالہ بچی کو اٹھا کر لے گیا تھا، جس کی لاش بعد میں ملی۔ اس واقعے نے علاقے میں خوف کی لہر دوڑا دی تھی۔ اگلے ہی روز تیندوا دوبارہ حملہ آور ہوا اور ایک نوجوان کو زخمی کر دیا۔

ایس پی مرزا زاہد کے مطابق، اگر کوئی خونخوار جانور ایک بار انسانوں کو نشانہ بنالے تو وہ بار بار حملہ کرنے کی کوشش کرتا ہے، اس لیے بروقت کارروائی ضروری تھی۔