پاکستان ویمنز کرکٹ ٹیم ٹی 20 سیریز کھیلنے آئرلینڈ پہنچ گئی

پاکستان ویمنز کرکٹ ٹیم ٹی 20 سیریز کھیلنے کے لیے براہِ راست دوحہ سے آئرلینڈ پہنچ گئی ہے۔

پاکستان کرکٹ بورڈ کے مطابق قومی ویمنز ٹیم اور آئرلینڈ کے درمیان تین میچوں پر مشتمل ٹی 20 سیریز 6 اگست سے شروع ہوگی۔ سیریز کے دوسرے اور تیسرے میچ بالترتیب 8 اور 10 اگست کو کھیلے جائیں گے۔ تمام میچز آئرلینڈ کے کلون ٹرف گراؤنڈ پر ہوں گے۔

قومی ویمنز اسکواڈ:

پاکستان ویمن ٹیم کی قیادت فاطمہ ثنا کریں گی۔ ٹیم میں شامل دیگر کھلاڑیوں میں عالیہ ریاض، ڈیانا بیگ، ایمان فاطمہ، گل فیروزہ، منیبہ علی اور وکٹ کیپر نجیحہ علوی شامل ہیں۔

نشرہ سندھو، نتالیہ پرویز، رامین شمیم، شوال ذوالفقار، سعدیہ اقبال، سدرہ امین، طوبیٰ حسن اور وحیدہ اختر بھی 15 رکنی اسکواڈ کا حصہ ہیں۔

کپتان کا پیغام:

آئرلینڈ کے خلاف سیریز سے قبل کپتان فاطمہ ثنا نے کہا کہ ٹیم نے اس مقابلے کے لیے سخت محنت کی ہے۔ تربیتی کیمپ میں کوچز نے خاص طور پر کھلاڑیوں کی صلاحیتوں کو بہتر بنانے پر توجہ دی ہے۔

انہوں نے مزید کہا کہ پلئیرز فارم میں ہیں، حوصلے بلند ہیں اور ٹیم سیریز میں بہترین کارکردگی دکھانے کے لیے پرعزم ہے۔