صارفین کیلئے ریلیف: بجلی 1.89 روپے فی یونٹ تک سستی ہو نے کاامکان

بجلی صارفین کے لیے خوشخبری، سہ ماہی ایڈجسٹمنٹ کی مد میں 1 روپے 89 پیسے جبکہ ماہانہ ایڈجسٹمنٹ میں 78 پیسے فی یونٹ کمی کا امکان ظاہر کیا گیا ہے۔

پاور ڈویژن کے مطابق یہ ممکنہ کمی مالی سال 2024-25 کی چوتھی سہ ماہی اور جون 2025 کی ماہانہ ایڈجسٹمنٹ کے تحت کی جائے گی۔

اعلامیے کے مطابق ڈسٹری بیوشن کمپنیوں (ڈسکوز) نے اپریل تا جون 2025 کی سہ ماہی ایڈجسٹمنٹ کی درخواست نیپرا کو جمع کروائی تھی، جس پر 4 اگست 2025 کو سماعت کی گئی۔

مزید کہا گیا ہے کہ سہ ماہی ایڈجسٹمنٹ کی یہ کمی اگست، ستمبر اور اکتوبر 2025 کے بجلی کے بلوں میں صارفین کو منتقل کی جائے گی۔

پاور ڈویژن کا کہنا ہے کہ بجلی کی پیداواری کمپنیوں کے ساتھ کیے گئے ترمیمی معاہدے اس کمی کی بڑی وجہ ہیں، جن کے تحت بجلی کی لاگت میں نمایاں کمی آئی ہے۔