شہریوں کےلیے بری خبر، ایک ہی روز میں سونا 14 ہزار روپے مہنگا،فی تولہ کتنے کا ہوگیا؟

کراچی :عالمی اور مقامی مارکیٹ میں سونے کی قیمتوں کا نیا ریکارڈ،فی تولہ سونا ایک دن میں 14 ہزار 100 روپے مہنگا ہوگیا۔

آل پاکستان جیمز اینڈ جیولرز ایسوسی ایشن کے مطابق کاروباری ہفتے کے آخری روزمقامی مارکیٹ میں فی تولہ سونا  14 ہزار 100 روپے مہنگا ہوگیا،جس کے بعد فی تولہ سونے کی قیمت پہلی بار 4 لاکھ 56 ہزار 900 روپے کی بلند سطح پر پہنچ گئی۔

ایسوسی ایشن کے مطابق اسی طرح دس گرام سونا بھی ایک ہی دن میں 12 ہزار 89 روپے مہنگا ہوا،دس گرام سونا پہلی بار 3 لاکھ 91 ہزار 718 روپے کی بلند سطح پر قائم ہے۔ 

دوسری جانب عالمی بلین مارکیٹ میں سونا 141 ڈالر مہنگاہوکر 4358 ڈالر فی اونس کی بلند ترین سطح پر پہنچ گیا۔

اسی طرح فی تولہ چاندی کی قیمت 167روپے کے اضافے سے 5ہزار 504روپے اور 10 گرام چاندی کی قیمت بھی 143روپے کے اضافے سے 4ہزار 718روپے کی نئی بلند ترین سطح پر آگئی ہے۔