سلطان جوہر کپ: پاکستان اور آسٹریلیا کا مقابلہ سنسنی خیز برابری پر ختم، قومی ٹیم فائنل کی دوڑ سے باہر

ملائیشیا میں جاری سلطان جوہر جونیئر ہاکی ٹورنامنٹ میں پاکستان اور آسٹریلیا کے درمیان ایک شاندار اور سنسنی خیز مقابلہ 3-3 گول سے برابر رہا، جس کے نتیجے میں قومی ٹیم فائنل میں جگہ بنانے سے محروم رہ گئی۔

آسٹریلوی ٹیم نے میچ کے آغاز سے ہی جارحانہ کھیل پیش کیا اور پہلے کوارٹر کے اختتام تک دو صفر (0-2) کی برتری حاصل کر لی۔ تاہم پاکستان کی نوجوان ٹیم نے ہمت نہ ہاری اور دوسرے اور تیسرے کوارٹرز میں تین شاندار گول کر کے میچ میں واپسی کی۔

اسی دوران کینگروز نے بھی ایک اور گول کیا، جس کے بعد میچ کا اختتام 3-3 کی برابری پر ہوا۔

پاکستان کی جانب سے کپتان حنان شاہد نے دو جبکہ سیف اللہ نے ایک گول اسکور کیا۔ اس مقابلے کے بعد گرین شرٹس نے 5 پوائنٹس حاصل کیے، لیکن فائنل میں رسائی حاصل نہ کر سکے۔

اب قومی ٹیم تیسری پوزیشن کے میچ میں کل برطانیہ کے خلاف میدان میں اترے گی۔

یاد رہے کہ اس سے قبل بھی پاکستان کا بھارت کے خلاف میچ 14 اکتوبر کو 3-3 سے برابر ہوا تھا، جو انتہائی سنسنی خیز مقابلہ ثابت ہوا تھا۔