افغانستان بھارتی پراکسی بن چکا، دہشت گردی کی قیمت اب کابل کو چکانا ہوگی، خواجہ آصف

وزیر دفاع خواجہ آصف نے کہا ہے کہ پاکستان کی بارہا کوششوں اور بھاری جانی قربانیوں کے باوجود افغان حکومت کی جانب سے مثبت رویہ دیکھنے کو نہیں ملا، اور اب وقت آ گیا ہے کہ ہم نئی حکمت عملی اپنائیں، کیونکہ افغانستان بھارت کا آلہ کار بن چکا ہے۔

سماجی رابطے کی ویب سائٹ X (سابق ٹوئٹر) پر جاری بیان میں خواجہ آصف نے کہا کہ طالبان کے اقتدار میں آنے کے بعد سے اب تک پاکستان نے افغان حکومت سے تعلقات بہتر بنانے اور امن قائم رکھنے کے لیے متعدد اقدامات کیے، لیکن ان کا خاطرخواہ نتیجہ سامنے نہیں آیا۔

انہوں نے تفصیل بتاتے ہوئے کہا کہ پاکستان کے وزیر خارجہ نے 4 مرتبہ، وزیر دفاع اور ڈی جی آئی ایس آئی نے 2 بار، نمائندہ خصوصی نے 5، سیکریٹری خارجہ نے 5، اور نیشنل سیکیورٹی ایڈوائزر نے ایک بار کابل کا دورہ کیا۔ اس کے علاوہ بارڈر فلیگ میٹنگز 225 بار ہوئیں، 836 احتجاجی مراسلے ارسال کیے گئے اور 13 مرتبہ احتجاجی نوٹس دیے گئے۔

خواجہ آصف نے بتایا کہ 2021 سے اب تک 3,844 پاکستانی شہری، فوجی اور قانون نافذ کرنے والے اہلکار شہید ہو چکے ہیں جبکہ دہشت گردی کے 10,347 واقعات پیش آئے۔

وزیر دفاع نے شدید تنقید کرتے ہوئے کہا"اب مزید احتجاجی مراسلے یا امن کی اپیلیں نہیں ہوں گی۔ دہشت گردی جہاں سے بھی ہوگی، اس کا سخت جواب دیا جائے گا۔"

انہوں نے الزام لگایا کہ افغان طالبان، بھارت اور کالعدم تحریک طالبان پاکستان (ٹی ٹی پی) نے پاکستان پر دہشت گردی کی جنگ مسلط کر رکھی ہے۔
انہوں نے یاد دہانی کرائی کہ طالبان قیادت کل تک پاکستان کی سرزمین پر پناہ لیے ہوئے تھی، مگر آج وہی عناصر بھارت کے اشاروں پر پاکستان کے خلاف سازشوں میں ملوث ہیں۔

خواجہ آصف نے واضح کیا کہ پاکستان اب کابل سے روایتی تعلقات کا متحمل نہیں ہوسکتا اور یہاں مقیم تمام افغان شہریوں کو واپس جانا ہوگا کیونکہ اب کابل میں ان کی "خود کی حکومت" قائم ہے۔

انہوں نے مزید کہا"ہمارے 25 کروڑ عوام کے وسائل دوسروں کی عیاشی کے لیے نہیں۔ 50 سالہ زبردستی کی میزبانی ختم کرنے کا وقت آ چکا ہے۔"