چار روزہ جنگ میں عظیم فتح ملی، بھارت کبھی نہ سنبھل سکے گا: وزیراعظم

وزیراعظم شہباز شریف نے کہا ہے کہ اللہ تعالیٰ نے پاکستان کو چار دن کی جنگ میں عظیم کامیابی سے نوازا، اور یہ شکست بھارت کیلئے ہمیشہ کا دکھ بن گئی ہے۔

جہانیاں میں رکن قومی اسمبلی افتخار نذیر کی رہائشگاہ پر سیاسی رہنماؤں سے گفتگو کرتے ہوئے وزیراعظم نے دعویٰ کیا کہ پاکستان نے حالیہ عرصے میں دفاعی اور معاشی شعبوں میں نمایاں کامیابیاں حاصل کی ہیں۔

انہوں نے کہا کہ گزشتہ ڈیڑھ سال کے دوران ملک دیوالیہ ہونے کے خطرے سے نکل چکا ہے، اور چند ماہ پہلے اللہ نے پاکستان کو ایک تاریخی کامیابی عطا کی۔ ان کا کہنا تھا کہ اس جنگ میں پاکستان کی تینوں افواج نے شاندار کردار ادا کیا، اور فیلڈ مارشل نے خود فرنٹ سے جنگ کی قیادت کی۔

وزیراعظم نے مزید کہا کہ مریم نواز اور ان کی ٹیم نے عوامی خدمت میں خلوص اور محنت کی ایک مثالی روایت قائم کی ہے۔