پاکستان اور یو اے ای کے درمیان فرسٹ ویمن بینک کی نجکاری کا جی ٹو جی معاہدہ طے پا گیا

اسلام آباد میں منعقدہ ایک اہم تقریب میں پاکستان اور متحدہ عرب امارات نے گورنمنٹ ٹو گورنمنٹ (G2G) فریم ورک کے تحت فرسٹ ویمن بینک کی نجکاری کے معاہدے پر دستخط کر دیے۔ اس موقع پر وزیراعظم شہباز شریف اور فیلڈ مارشل سید عاصم منیر بھی شریک تھے۔

یہ معاہدہ پاکستان کے مالیاتی شعبے کو مزید مستحکم بنانے، شفافیت کو فروغ دینے اور سرمایہ کاری کے نئے دروازے کھولنے کے لیے اہم قدم تصور کیا جا رہا ہے۔

تقریب سے خطاب کرتے ہوئے وزیراعظم شہباز شریف نے کہا کہ اس نجکاری سے ملکی معیشت کو استحکام ملے گا جبکہ بینکاری نظام میں مقابلے کا رجحان اور شفافیت بھی بڑھے گی۔

وزیراعظم نے متحدہ عرب امارات کے ساتھ تعلقات کو تاریخی اور مضبوط قرار دیتے ہوئے کہا کہ دونوں ممالک کے درمیان معاشی روابط میں حالیہ عرصے میں غیرمعمولی بہتری آئی ہے۔ انہوں نے اس اعتماد کا اظہار کیا کہ باہمی منصوبے دونوں ملکوں کے لیے فائدہ مند ثابت ہوں گے اور تعاون کو نئی جہت ملے گی۔

انہوں نے یو اے ای کے شہزادے شیخ زید بن حمدان کا پاکستان آمد پر خیرمقدم کیا اور مرحوم شیخ زید النہیان کو پاکستان کا دیرینہ اور مخلص دوست قرار دیا۔

شہباز شریف نے مزید کہا کہ شیخ محمد زید بن حمدان پاکستان کے ساتھ معاشی شراکت کو مزید وسعت دینا چاہتے ہیں، اور جی ٹو جی معاہدہ دونوں ملکوں کے درمیان ترقی اور خوشحالی کے ایک نئے دور کا آغاز ہے۔

وزیراعظم نے یہ بھی کہا کہ آئندہ دنوں میں کئی نئے مشترکہ منصوبے شروع کیے جائیں گے، جبکہ حکومتی سطح پر ادارہ جاتی اصلاحات کا عمل بھی جاری ہے۔