نومبر احتجاج کیس: علیمہ خان کے ناقابلِ ضمانت وارنٹ، گرفتاری کے لیے راولپنڈی پولیس متحرک

نومبر 2022 کے احتجاج کے مقدمے میں علیمہ خان کی عدم پیشی پر جاری کیے گئے ناقابلِ ضمانت وارنٹ گرفتاری پر عملدرآمد کے لیے راولپنڈی پولیس نے خصوصی ٹیم تشکیل دے دی ہے۔

ذرائع کے مطابق تھانہ صادق آباد کی پولیس ٹیم عدالت سے جاری وارنٹ کے ساتھ آج لاہور روانہ ہوگی۔ علیمہ خان کا پتہ وارنٹ میں 14، اپر مال روڈ لاہور درج ہے۔

یاد رہے کہ انسداد دہشت گردی عدالت راولپنڈی نے گزشتہ جمعہ کو علیمہ خان کی مسلسل غیر حاضری کے باعث ناقابلِ ضمانت وارنٹ جاری کیے تھے۔ پولیس نے ان کے ضامن عمر شریف کو سمن کی تعمیل کے لیے بھی علیحدہ ٹیم مقرر کر دی ہے۔

ضامن عمر شریف، جو راولپنڈی کے رہائشی ہیں، نے علیمہ خان کی ضمانت کے لیے ایک لاکھ روپے کے مچلکے جمع کرائے تھے۔ سمن کے مطابق اگر علیمہ خان 20 اکتوبر کو عدالت میں پیش نہ ہوئیں تو ضامن کے خلاف بھی قانونی کارروائی عمل میں لائی جائے گی۔

نومبر احتجاج کیس میں علیمہ خان سمیت 11 ملزمان پر فردِ جرم عائد کی جاچکی ہے، اور آئندہ سماعت پر استغاثہ نے پانچ گواہوں کو طلب کر رکھا ہے۔ کیس میں مجموعی طور پر 87 افراد کے خلاف چالان جمع کرایا گیا تھا، جن میں سے 9 ملزمان نے جرم کا اعتراف کرتے ہوئے سزائیں حاصل کیں، جبکہ 66 افراد تاحال اشتہاری قرار دیے جا چکے ہیں۔