بلوچستان میں افغان مہاجرین کے 10 کیمپ بند، 85 ہزار افراد واپس بھجوائے گئے

بلوچستان میں مقیم افغان مہاجرین کے خلاف کارروائیاں تیز کر دی گئی ہیں۔ سرکاری ذرائع کے مطابق صوبے میں قائم 10 مہاجر کیمپ مکمل طور پر بند کر دیے گئے ہیں، جن میں مجموعی طور پر 85 ہزار افغان شہری مقیم تھے۔ ان تمام افراد کو واپس افغانستان بھیجا جا چکا ہے۔

بند کیے جانے والے کیمپوں میں سے ایک کوئٹہ، دو پشین، تین لورالائی، تین چاغی اور ایک قلعہ عبداللہ میں واقع تھا۔

مزید برآں، کوئٹہ میں غیر قانونی طور پر مقیم افغان باشندوں کے خلاف کریک ڈاؤن بھی جاری ہے۔ گزشتہ روز شہر سے 3 ہزار 888 افغان مہاجرین کو حراست میں لیا گیا۔

حکام کے مطابق بلوچستان میں تقریباً 5 لاکھ افغان مہاجرین رجسٹرڈ تھے، جن میں سے بڑی تعداد کی واپسی کا عمل جاری ہے۔