محسن نقوی کی بلاول بھٹو سے ملاقات، سیاسی و سیکیورٹی امور پر گفتگو

وفاقی وزیر داخلہ محسن نقوی نے چیئرمین پیپلز پارٹی بلاول بھٹو زرداری سے بلاول ہاؤس کراچی میں اہم ملاقات کی، جس میں ملک کی مجموعی سیاسی صورتحال اور باہمی دلچسپی کے مختلف امور پر تفصیلی گفتگو کی گئی۔

ملاقات کے دوران وزیر داخلہ نے بلاول بھٹو زرداری کو ملک میں داخلی سیکیورٹی، قیامِ امن، اور امن و امان کی بحالی کے لیے کیے گئے اقدامات سے آگاہ کیا۔

چیئرمین پیپلزپارٹی نے اس موقع پر کہا کہ ملک کو درپیش چیلنجز کا سامنا قومی اتحاد اور باہمی ہم آہنگی کے ذریعے ہی کیا جا سکتا ہے۔

محسن نقوی کا کہنا تھا کہ پاکستان کے داخلی استحکام اور پائیدار امن کے لیے تمام سیاسی قوتوں کو مل کر کردار ادا کرنا ہوگا۔ بلاول بھٹو زرداری نے داخلی سلامتی سے متعلق اقدامات پر اطمینان کا اظہار کیا۔