ویمنز ورلڈکپ میں حیران کن اسٹمپنگ، گیند وکٹ کیپر کی ٹانگ سے لگ کر بیلز گرا گئی

آئی سی سی ویمنز کرکٹ ورلڈکپ کے دوران بنگلادیش اور سری لنکا کے میچ میں ایک حیران کن اور غیر معمولی اسٹمپنگ کا واقعہ پیش آیا، جس نے کھلاڑیوں اور کمنٹیٹرز کو بھی دنگ کر دیا۔

پیر کے روز بھارت کے ڈی وائی پاٹل اسٹیڈیم میں کھیلے گئے میچ کے دوران یہ انوکھا لمحہ اس وقت آیا جب سری لنکا کی اننگز کے 20ویں اوور میں بنگلادیشی اسپنر ناہیدہ نے آف اسٹمپ کے باہر گیند کروائی۔ سری لنکن بیٹر دلہاری نے بیک فٹ پر شاٹ کھیلنے کی کوشش کی، لیکن گیند بیٹ کے اندرونی کنارے سے لگ کر آف اسٹمپ کے قریب اچھلی۔

یہ گیند بنگلادیشی وکٹ کیپر نگار سلطانہ کی دائیں ٹانگ سے ٹکرا کر سیدھی اسٹمپ پر جا لگی، اور بیلز زمین پر آ گریں۔ دلچسپ بات یہ ہے کہ اس لمحے بیٹر کا پچھلا پاؤں ہوا میں تھا۔

ابتدائی طور پر بنگلادیشی کھلاڑیوں نے ہلکی سی اپیل کی، جس کے بعد امپائر نے معاملہ تھرڈ امپائر کے سپرد کیا۔ ری پلے دیکھنے پر معلوم ہوا کہ بیٹر کریز سے باہر تھی اور اسی بنیاد پر تھرڈ امپائر نے انہیں آؤٹ قرار دے دیا۔

فیصلہ اسکرین پر آتے ہی جہاں بنگلادیشی ٹیم خوشی سے جھوم اٹھی، وہیں کمنٹیٹرز اور شائقین کرکٹ حیرت میں پڑ گئے۔

یہ واقعہ اس لیے بھی منفرد سمجھا جا رہا ہے کہ عموماً اسٹمپنگ میں وکٹ کیپر گیند کو دستانے سے پکڑ کر اسٹمپ توڑتا ہے، لیکن یہاں گیند وکٹ کیپر کے جسم سے لگ کر ازخود اسٹمپ سے جا ٹکرائی۔