مسلم لیگ (ن) آزاد کشمیر نے حکومت سے علیحدگی کا اعلان کر دیا

مسلم لیگ (ن) آزاد کشمیر نے حکومت سے علیحدگی کا باضابطہ اعلان کر دیا ہے۔ پارٹی کے صدر شاہ غلام قادر نے واضح کیا ہے کہ مسلم لیگ (ن) کسی غیر فطری حکومت سازی کا حصہ نہیں بنے گی اور اب ایوان میں اپوزیشن کا کردار ادا کرے گی۔

انہوں نے کہا کہ اگر پیپلز پارٹی تحریک عدم اعتماد لاتی ہے تو یہ اس کا جمہوری حق ہے، تاہم مسلم لیگ (ن) کسی نئی حکومت میں شامل نہیں ہوگی۔

شاہ غلام قادر کا کہنا تھا کہ پارٹی پالیسی سے انحراف کرنے والوں کے خلاف کارروائی کی جائے گی اور مسلم لیگ (ن) کا موقف ہے کہ نئی حکومت کی تشکیل صرف شفاف عام انتخابات کے ذریعے ممکن ہے۔

انہوں نے کہا کہ جماعت کشمیری مہاجرین اور بیرون ملک مقیم کشمیریوں کی فلاح و بہبود کے لیے متحرک ہے اور سیاسی و آئینی بحران کے حل میں تعمیری کردار ادا کرتی رہے گی۔

صدر مسلم لیگ (ن) آزاد کشمیر نے یہ بھی کہا کہ پارٹی قائدین نواز شریف اور شہباز شریف کی قیادت میں آئندہ انتخابات کے لیے بھرپور مہم چلائی جائے گی۔