بھارتی حمایت یافتہ گروپس تشدد کو ہوا دے رہے ہیں، پراکسیز کا خاتمہ ضروری ہے ، آرمی چیف

آرمی چیف فیلڈ مارشل سید عاصم منیر نے خبردار کیا ہے کہ بھارتی حمایت یافتہ گروپس "فتنۃ الہندوستان" اور "فتنۃ الخوارج" عوام مخالف پروپیگنڈا پھیلا رہے ہیں جس سے تشدد کو ہوا مل رہی ہے، اور ان دہشت گرد پراکسیز کے خاتمے کے لیے ضروری اقدامات کیے جائیں گے۔

پاک فوج کے شعبۂ تعلقات عامہ (آئی ایس پی آر) کے مطابق فیلڈ مارشل عاصم منیر نے 17ویں نیشنل ورکشاپ بلوچستان کے شرکاء سے خطاب میں کہا کہ بلوچستان ملک کا فخر ہے اور یہاں کے محبِ وطن، باصلاحیت اور پرعزم عوام صوبے کی بے پناہ اقتصادی صلاحیت سے فائدہ اٹھا سکتے ہیں۔

انہوں نے وفاقی اور صوبائی سطح پر جاری ترقیاتی کوششوں کی جانب اشارہ کرتے ہوئے نوجوانوں پر زور دیا کہ وہ ترقی اور پائیدار استحکام کے حصول میں اپنا کردار ادا کریں۔

یاد رہے کہ چند روز قبل پی ایم اےٰ کوکول کے پاسنگ آؤٹ پریڈ میں بھی آرمی چیف نے نئی دہلی کو خبردار کرتے ہوئے کہا تھا کہ جوہری ماحول میں جنگ کے لیے کوئی گنجائش نہیں، اور اگر کشیدگی بڑھی تو اس کے تباہ کن نتائج کا بوجھ پوری طرح بھارت کے کندھوں پر ہوگا۔