وزیراعظم نے وفاقی کابینہ کا اہم اجلاس کل طلب کر لیا

وزیراعظم شہباز شریف نے وفاقی کابینہ کا اہم اجلاس کل (منگل) شام ساڑھے چار بجے وزیراعظم ہاؤس میں طلب کر لیا ہے، جس میں ملک کی مجموعی داخلی، معاشی اور سیاسی صورتحال پر تفصیلی غور کیا جائے گا۔

 ذرائع کا کہنا ہے کہ اجلاس کے دوران پاک-افغان سرحدی صورتحال پر بھی بریفنگ دی جائے گی، جب کہ ایک مذہبی جماعت پر ممکنہ پابندی سے متعلق معاملے کا بھی جائزہ لیے جانے کا امکان ہے۔

ذرائع کے مطابق، اجلاس میں متعدد اہم سمریاں منظوری کے لیے کابینہ کے سامنے پیش کی جائیں گی۔
حکومتی حلقوں کا ماننا ہے کہ اجلاس میں بعض فیصلہ کن اقدامات اور پالیسی فیصلوں پر مشاورت کی جائے گی، خصوصاً ملک میں سیکیورٹی اور سیاسی استحکام سے جڑے معاملات پر۔