پیپلز پارٹی نظام کو ڈی ریل نہیں کرنا چاہتی، بہتری کے لیے مہلت دے رہی ہے: حسن مرتضیٰ

پیپلز پارٹی پنجاب کے سینئر رہنما حسن مرتضیٰ کا کہنا ہے کہ پارٹی نے ہمیشہ بردباری اور تحمل کا راستہ اختیار کیا ہے اور جلد بازی یا انتقام کے بجائے سسٹم کی بہتری کے لیے موقع دینے کو ترجیح دی ہے۔

اسلام آباد میں میڈیا سے گفتگو کرتے ہوئے ان کا کہنا تھا کہ "سی ای سی کے فیصلے کے مطابق پیپلز پارٹی نظام کو ڈی ریل کرنے کی قائل نہیں۔ اگرچہ سارا نظام ایک لمحے میں ہلایا جا سکتا ہے، مگر ہم نے استحکام اور اصلاحات کو ترجیح دی ہے۔"

حکومتیں مکمل مدت پوری نہیں کر پاتیں

حسن مرتضیٰ کا کہنا تھا کہ "پیپلز پارٹی کی قربانیوں سے جمہوری نظام بحال ہوا ہے، آج پارلیمنٹ تو پانچ سال مکمل کر لیتی ہے، لیکن حکومتیں اپنی مدت پوری کرنے میں کامیاب نہیں ہوتیں۔"

مریم نواز کے رویے پر معافی کی بات سے ہٹنے کا سوال

صحافی کی جانب سے یہ پوچھنے پر کہ کیا پیپلز پارٹی مریم نواز سے مبینہ بدسلوکی پر معافی کے مطالبے سے پیچھے ہٹ گئی ہے، حسن مرتضیٰ نے جواب دیا:
"بدتمیزی ایک معمولی بات ہے، شاید وہ ان کے لاشعور کا حصہ ہو، ہم اسے سنجیدگی سے نہیں لیتے۔"

انہوں نے مشورہ دیا کہ "پارٹی ترجمانوں کو الفاظ کے چناؤ اور ابلاغ کی صلاحیت بہتر بنانی چاہیے تاکہ سیاست دان تماشا نہ بنیں۔"

سیلاب اور ریلیف پر پنجاب حکومت پر تنقید

پیپلز پارٹی رہنما نے پنجاب حکومت پر سیلاب سے متعلق اعداد و شمار میں مبالغہ آرائی کا الزام لگاتے ہوئے کہا کہ
"اتنی کشتیوں میں لاکھوں افراد کو ایک ہفتے میں ریسکیو کرنا ممکن نہیں، یہ عمل کم از کم چھ ماہ لیتا۔"

انہوں نے حکومت سے سوال کیا کہ "بینظیر انکم سپورٹ پروگرام کی فوری امدادی حکمتِ عملی کو مسترد کیا گیا، اب موجودہ امداد کس نظام کے تحت دی جا رہی ہے؟"