پاکستان ہاکی ٹیم بھارت میں جونیئر ورلڈ کپ میں شرکت نہیں کرے گی

پاکستان ہاکی فیڈریشن (پی ایچ ایف) نے فیصلہ کیا ہے کہ قومی جونیئر ہاکی ٹیم کو آئندہ ماہ بھارت میں ہونے والے جونیئر ورلڈ کپ میں شرکت کے لیے نہیں بھیجا جائے گا۔ یہ ایونٹ 28 نومبر سے 10 دسمبر تک شیڈول ہے۔

یہ فیصلہ اسلام آباد میں ہونے والے ایک اعلیٰ سطح کے اجلاس میں کیا گیا، جہاں بھارت کے ساتھ سیکیورٹی خدشات اور بین الاقوامی کھیلوں میں بھارتی حکام کے جانبدار رویے، خصوصاً حالیہ ایشیا کپ کرکٹ ٹورنامنٹ کے دوران پیش آنے والی صورت حال کا جائزہ لیا گیا۔

"پاکستانی حکام اور فیڈریشن کھلاڑیوں کی سیکیورٹی پر کسی قسم کا سمجھوتہ نہیں کرنا چاہتے، اسی لیے بھارت میں ٹیم کی شرکت سے گریز کا فیصلہ کیا گیا ہے۔"

عہدیدار نے مزید بتایا کہ پی ایچ ایف اپنا باضابطہ مؤقف جلد ہاکی انڈیا کو تحریری طور پر آگاہ کرے گی۔

ہائبرڈ ماڈل نہ ہونے پر اعتراض

ذرائع کے مطابق، انٹرنیشنل کرکٹ کونسل (آئی سی سی) نے پاکستان-بھارت میچز کے لیے ہائبرڈ ماڈل متعارف کرایا ہے، جس کے تحت نیوٹرل وینیو پر میچز کروائے گئے۔
تاہم، فیڈریشن آف انٹرنیشنل ہاکی (ایف آئی ایچ) کی جانب سے اب تک ایسا کوئی متبادل انتظام فراہم نہیں کیا گیا، جس پر پاکستان نے تحفظات کا اظہار کیا ہے۔

قابلِ ذکر ہے کہ پاکستان نے گزشتہ ماہ بھارت میں منعقد ہونے والا ایشیا ہاکی کپ بھی اسی بنیاد پر نہیں کھیلا، حالانکہ وہ ایونٹ ورلڈ کپ کے کوالیفائنگ راؤنڈ کے طور پر منعقد کیا گیا تھا۔