پی سی بی نے پی ایس ایل فرنچائز ملتان سلطانز کو معطل کردیا،مگر کیوں؟

لاہور: پاکستان کرکٹ بورڈ (پی سی بی) نے پاکستان سپر لیگ (پی ایس ایل) کی فرنچائز ملتان سلطانز کو معاہدے کی شرائط کی مبینہ خلاف ورزی پر معطلی کا نوٹس جاری کر دیا ہے۔

ذرائع کے مطابق پی سی بی نے فرنچائز کو معاہدے کی خلاف ورزی پر باضابطہ نوٹس جاری کر دیا، پی سی بی نے تمام قانونی تقاضے مکمل کرنے کے بعد ملتان سلطانز کو معطلی کا نوٹس بھیجا جس میں معاہدے کی منسوخی کی تنبیہ بھی شامل ہے۔

ذرائع کا کہنا ہے کہ فرنچائز کے مالک علی ترین کی جانب سے پی سی بی اور پی ایس ایل انتظامیہ کے خلاف بار بار انٹرویوز دینا معطلی کی اہم وجہ بنا۔

ذرائع کا مزید کہنا ہے کہ ان انٹرویوز سے پی ایس ایل کی ساکھ کو نقصان پہنچا جس پر بورڈ نے سخت نوٹس لیا،جبکہ ذرائع کا مزید کہنا ہے کہ 
اس معاملے پر مزید قانونی کارروائی کا امکان بھی موجود ہے۔ 

خیال رہے کہ ملتان سلطانز پاکستان سپر لیگ کی سب سے ہائی پروفائل ٹیموں میں سے ایک ہے، اس کی سب سے مہنگی فرنچائز بھی ہے، جس نے 2021 میں پہلی بار ٹائٹل جیتا تھا اور حالیہ سیزنز میں بھی مسلسل فائنلز تک رسائی حاصل کی ہے۔