غزہ میں بین الاقوامی فورس تعینات کرنے کی تیاری، پاکستانی فوج کی ممکنہ شمولیت کا دعویٰ

اسرائیلی اخبار نے دعویٰ کیا ہے کہ غزہ میں ممکنہ طور پر تعینات کی جانے والی بین الاقوامی فورس میں پاکستان کے فوجی دستے بھی شامل ہوسکتے ہیں۔

اسرائیلی روزنامہ ٹائمز آف اسرائیل کے مطابق، اسرائیلی دفاعی حکام نے قانون سازوں کو بریفنگ دیتے ہوئے بتایا کہ غزہ میں دو سالہ جنگ کے بعد استحکام قائم کرنے کے لیے ایک بین الاقوامی فورس کی تشکیل پر غور کیا جا رہا ہے، جس میں پاکستان سمیت متعدد مسلم ممالک کے فوجی شامل ہوسکتے ہیں۔

اس حوالے سے اسرائیلی ویب سائٹ ’وائی نیٹ نیوز‘ نے اپنی رپورٹ میں کہا ہے کہ گزشتہ ہفتے اسرائیلی پارلیمان (کینیسٹ) کی خارجہ و دفاعی امور کمیٹی کے بند کمرہ اجلاس میں بریفنگ کے دوران بتایا گیا کہ مجوزہ فورس میں انڈونیشیا، آذربائیجان اور پاکستان کے فوجی دستے شامل کیے جانے پر غور کیا جا رہا ہے۔

رپورٹ کے مطابق، انڈونیشیا پہلے ہی اپنے فوجی بھیجنے کی پیشکش کر چکا ہے، جبکہ آذربائیجان نے بھی اپنے دستے فراہم کرنے پر آمادگی ظاہر کی ہے۔ تاہم پاکستانی افواج کی ممکنہ شمولیت سے متعلق ابھی تک کوئی باضابطہ اعلان یا تصدیق سامنے نہیں آئی۔

خیال رہے کہ گزشتہ روز وفاقی وزیرِ اطلاعات عطااللہ تارڑ نے غزہ میں پاکستانی افواج کی تعیناتی کے حوالے سے صحافیوں کے سوال پر کہا تھا کہ اس بارے میں وزارتِ خارجہ مناسب وقت پر جواب دے گی۔