خیبر پختونخوا اسمبلی سے گوجری زبان کو پارلیمانی زبان قرار دینے کی منظوری

خیبر پختونخوا اسمبلی نے گوجری زبان کو پارلیمانی زبان کا درجہ دینے کی منظوری دے دی ہے۔

اسمبلی کے رولز آف پروسیجر 2025 میں ترمیم کرتے ہوئے گوجری زبان کو باضابطہ طور پر فہرست میں شامل کرلیا گیا۔

یہ ترمیم حکومتی رکن آفتاب عالم نے ایوان میں پیش کی، جسے ارکان اسمبلی نے متفقہ طور پر منظور کرلیا۔

اس موقع پر اسپیکر خیبر پختونخوا اسمبلی بابر سلیم سواتی نے کہا کہ ایوان میں گوجری بولنے والے ارکان کی ایک بڑی تعداد موجود ہے۔ ان کے مطابق جب 2025 کے اسمبلی رولز تیار کیے گئے تھے، اُس وقت گوجری زبان کو شامل کرنا رہ گیا تھا، جس کی اب کمی پوری کردی گئی ہے۔

اسپیکر نے بتایا کہ گوجری زبان کے اضافے کے بعد اسمبلی میں بات چیت کے لیے زبانوں کی مجموعی تعداد چھ ہوگئی ہے۔

اب اراکین اسمبلی اردو، انگریزی، پشتو، سرائیکی، ہندکو کے ساتھ ساتھ گوجری زبان میں بھی ایوان سے خطاب کر سکیں گے۔