ایران میں افغان قیدی کو منشیات کے الزام میں پھانسی

ایران کی جیلوں میں منشیات کے الزامات پر ایک افغان قیدی کو سزائے موت دے دی گئی۔

افغان میڈیا نے ناروے میں قائم ایران ہیومن رائٹس تنظیم کے حوالے سے بتایا کہ اسلام میر سعید کو 20 اکتوبر کو یزد کی مرکزی جیل میں پھانسی دی گئی۔

تنظیم کے مطابق، اسلام میر سعید کی عمر 59 سال تھی، جبکہ اس کے 21 سالہ بیٹے کو جرم میں مبینہ شراکت کے الزام میں نو سال قید کی سزا سنائی گئی ہے اور وہ تاحال جیل میں ہے۔

افغان میڈیا کے مطابق، ایران میں منشیات کے دیگر جرائم میں قید سات ایرانی شہریوں کو بھی اتوار کے روز مختلف جیلوں میں پھانسی دی گئی، جن میں تبریز، سمنان، ملایر، بروجرد، قزوین اور گرگان شامل ہیں۔