فیلڈ مارشل عاصم منیر کی شاہ عبداللہ سے ملاقات، دفاعی تعاون بڑھانے پر اتفاق

فیلڈ مارشل سید عاصم منیر نے اردن کے شاہ عبداللہ دوم سے ملاقات کی، جس میں دوطرفہ دفاعی تعاون کے فروغ سمیت علاقائی امور پر تبادلہ خیال کیا گیا۔

آئی ایس پی آر کے مطابق، ملاقات میں اردن کے ولی عہد شہزادہ حسین بن عبداللہ بھی شریک تھے۔ بات چیت میں باہمی دلچسپی کے امور، دفاع اور سکیورٹی کے شعبوں میں تعاون بڑھانے اور علاقائی امن و استحکام سے متعلق معاملات پر تفصیلی گفتگو ہوئی۔

آئی ایس پی آر نے بتایا کہ آرمی چیف نے پاکستانی عوام، حکومت اور مسلح افواج کی جانب سے شاہ عبداللہ کے لیے نیک خواہشات کا اظہار کیا اور اردن کے ساتھ برادرانہ تعلقات کو مزید مضبوط بنانے کے عزم کا اعادہ کیا۔

شاہ عبداللہ دوم نے پاکستان آرمی کی پیشہ ورانہ صلاحیتوں اور علاقائی امن کے لیے کردار کو سراہتے ہوئے پاکستان کے ساتھ دوطرفہ دفاعی تعاون کو مزید فروغ دینے کی خواہش ظاہر کی۔

ترجمان کے مطابق، فیلڈ مارشل سید عاصم منیر نے اردنی مسلح افواج کے چیئرمین جوائنٹ چیفس آف اسٹاف میجر جنرل یوسف احمد الحنیتی سے بھی ملاقات کی۔ اس موقع پر عمان میں جنرل ہیڈکوارٹرز آمد پر انہیں گارڈ آف آنر پیش کیا گیا۔

دونوں ممالک کے عسکری رہنماؤں نے پاکستان اور اردن کی مسلح افواج کے درمیان دیرینہ، قریبی اور برادرانہ تعلقات کو سراہا۔
میجر جنرل یوسف احمد الحنیتی نے علاقائی امن و سلامتی کے لیے پاکستان کی مسلح افواج کے کردار کو خراجِ تحسین پیش کیا۔