ایمازون کا 14 ہزار ملازمین کو فارغ کرنے کا اعلان

دنیا کی سب سے بڑی ای کامرس کمپنی ایمازون نے تصدیق کی ہے کہ وہ اپنے کارپوریٹ شعبے میں 14 ہزار ملازمین کو فارغ کر رہی ہے۔

کمپنی کا کہنا ہے کہ مصنوعی ذہانت (AI) کے بڑھتے ہوئے کردار کے سبب اسے زیادہ مؤثر اور ہلکے ڈھانچے میں منتقل ہونے کی ضرورت ہے تاکہ نئے مواقع سے فائدہ اٹھایا جا سکے۔ ابتدائی طور پر کہا جا رہا تھا کہ کمپنی 30 ہزار ملازمین کو فارغ کر سکتی ہے، تاہم اب تعداد 14 ہزار تک محدود کی گئی ہے۔

ایمازون کی سینیئر نائب صدر بیتھ گیلیٹی نے ملازمین کو لکھے گئے نوٹ میں کہا کہ یہ فیصلہ کمپنی کو مضبوط بنانے اور وسائل کو ایسے شعبوں میں منتقل کرنے کے لیے کیا جا رہا ہے جو کمپنی اور صارفین کے لیے زیادہ اہم ہیں۔ انہوں نے واضح کیا کہ مصنوعی ذہانت نے کام کی رفتار اور جدت کو بے مثال حد تک بڑھا دیا ہے۔

کمپنی متاثرہ ملازمین کی مدد کے لیے کام کر رہی ہے، جہاں ممکن ہوا انہیں کمپنی کے اندر نئی ذمہ داریاں دی جائیں گی، اور باقی ملازمین کو خصوصی پیکج اور معاونت فراہم کی جائے گی۔

واضح رہے کہ ایمازون کے دنیا بھر میں 15 لاکھ سے زائد ملازمین کام کرتے ہیں۔