جنوبی افریقا کی شاندار جیت، پاکستان کو پہلے ٹی ٹوئنٹی میں 55 رنز سے شکست

راولپنڈی میں کھیلے گئے تین میچوں پر مشتمل ٹی ٹوئنٹی سیریز کے پہلے میچ میں جنوبی افریقا نے پاکستان کو 55 رنز سے شکست دے کر سیریز میں 0-1 کی برتری حاصل کرلی۔

جنوبی افریقا نے پہلے بیٹنگ کرتے ہوئے 20 اوورز میں 9 وکٹوں پر 194 رنز بنائے۔ ریزا ہینڈرکس نے 60، جارج لنڈے نے 36 اور ڈی زور زی نے 33 رنز کی شاندار اننگز کھیلی۔
پاکستان کی جانب سے محمد نواز نے 3، صائم ایوب نے 2 جبکہ شاہین آفریدی، ابرار احمد اور نسیم شاہ نے ایک ایک وکٹ حاصل کی۔

ہدف کے تعاقب میں پاکستانی ٹیم 19ویں اوور میں 139 رنز پر ڈھیر ہوگئی۔ صائم ایوب 37 اور محمد نواز 36 رنز بنا کر نمایاں رہے، جبکہ کپتان سلمان علی آغا صرف 2 اور بابر اعظم بغیر کھاتہ کھولے آؤٹ ہوئے۔
جنوبی افریقا کے کاربن بوش نے 4، جارج لنڈے نے 3 اور لیزاڈ ولیمز نے 2 وکٹیں حاصل کیں۔

میچ کے دوران چھاتی کے سرطان سے آگاہی مہم کے تحت پاکستانی ٹیم نے گلابی رنگ کی خصوصی کٹ پہنی، جبکہ جنوبی افریقی کھلاڑیوں اور میچ آفیشلز نے گلابی ربن پہن کر یکجہتی کا اظہار کیا۔