سیکیورٹی خدشات کے باعث پاکستان جونیئر ہاکی ٹیم ورلڈکپ 2025 سے دستبردار

بھارت میں سیکیورٹی خدشات کے باعث پاکستان جونیئر ہاکی ٹیم نے جونیئر ورلڈکپ 2025 سے دستبرداری اختیار کر لی ہے۔

انٹرنیشنل ہاکی فیڈریشن (ایف آئی ایچ) نے پاکستان کی دستبرداری کی تصدیق کر دی ہے۔ ایف آئی ایچ نے پاکستان کی جگہ عمان کی ٹیم کو بہتر رینکنگ کی بنیاد پر میگا ایونٹ میں شامل کر لیا ہے۔

جونیئر ہاکی ورلڈکپ 28 نومبر سے 10 دسمبر تک بھارت میں شیڈول ہے۔

یاد رہے کہ پاکستان ہاکی فیڈریشن (پی ایچ ایف) نے 22 اکتوبر کو اسلام آباد میں ہونے والے ایک اعلیٰ سطحی اجلاس کے بعد فیصلہ کیا تھا کہ قومی جونیئر ٹیم بھارت نہیں بھیجی جائے گی۔

اجلاس میں سیکیورٹی خدشات کے ساتھ ساتھ بھارت کی جانب سے پاکستان کے خلاف کھیلوں میں منفی رویے، خصوصاً حالیہ ایشیا کپ کے دوران بھارتی کرکٹ ٹیم کے رویے پر بھی غور کیا گیا تھا۔

پی ایچ ایف کے ایک عہدیدار نے ڈان ڈاٹ کام کو بتایا تھا کہ فیڈریشن جلد ہی اپنے فیصلے سے ہاکی انڈیا کو باضابطہ طور پر آگاہ کرے گی۔ ان کا کہنا تھا کہ پی ایچ ایف اور حکومت کھلاڑیوں کی سیکیورٹی پر کوئی سمجھوتہ نہیں کرنا چاہتیں، اسی لیے ٹیم کو بھارت نہ بھیجنے کا فیصلہ کیا گیا ہے۔