پیپلز پارٹی نے آزاد کشمیر میں وزارتِ عظمیٰ کے لیے چوہدری یاسین کو نامزد کر دیا

پیپلز پارٹی نے آزاد کشمیر میں وزارتِ عظمیٰ کے امیدوار کا نام فائنل کر لیا ہے۔

ذرائع کے مطابق، آزاد جموں و کشمیر قانون ساز اسمبلی میں ممکنہ ان ہاؤس تبدیلی کے سلسلے میں پیپلز پارٹی نے چوہدری یاسین کو وزارتِ عظمیٰ کے لیے اپنا امیدوار نامزد کر دیا ہے۔

پارٹی ذرائع کا کہنا ہے کہ چوہدری یاسین کے نام کا اعلان بلاول بھٹو زرداری نے زرداری ہاؤس میں کیا، جہاں پیپلز پارٹی آزاد کشمیر کی قیادت بھی موجود تھی۔

اطلاعات کے مطابق، وزارتِ عظمیٰ کے لیے پیپلز پارٹی میں چار ناموں پر غور کیا گیا، جن میں چوہدری یاسین، لطیف اکبر، فیصل ممتاز راٹھور اور سردار یعقوب شامل تھے۔

ذرائع کے مطابق، وزیراعظم آزاد کشمیر انوار الحق کے خلاف تحریکِ عدم اعتماد کل آزاد کشمیر اسمبلی سیکرٹریٹ میں جمع کرائی جائے گی۔