سوڈان میں باغی فورس کا الفشر شہر پر قبضہ، 2 ہزار افراد ہلاک

سوڈان میں باغی فوج ریپڈ سپورٹ فورس (RSF) نے الفشر شہر پر حملہ کرکے مکمل قبضہ کرلیا ہے، جبکہ اس دوران کم از کم 2 ہزار افراد کو قتل کر دیا گیا۔

رپورٹس کے مطابق، ریپڈ سپورٹ فورسز نے 26 اکتوبر کو سوڈانی فوج کے گڑھ سمجھے جانے والے شہر الفشر پر شدید حملہ کیا اور چند گھنٹوں کی جھڑپوں کے بعد شہر پر قبضہ حاصل کر لیا۔

سوڈانی حکومت کا کہنا ہے کہ شہر میں اب تک 2 ہزار سے زائد افراد ہلاک ہو چکے ہیں، جبکہ امدادی تنظیموں نے عام شہریوں کے قتل، فرار کے دوران حملوں، گھروں پر چھاپوں اور اجتماعی پھانسیوں کی تصدیق کی ہے۔

اطلاعات کے مطابق، خواتین اور لڑکیوں کے خلاف جنسی تشدد کے متعدد واقعات بھی رپورٹ ہوئے ہیں۔

الفشر پر قبضے کے بعد ریپڈ سپورٹ فورسز نے دارفور کے بیشتر علاقے پر تقریباً مکمل کنٹرول حاصل کر لیا ہے، جس کے باعث خدشہ ظاہر کیا جا رہا ہے کہ سوڈان ایک بار پھر تقسیم کے دہانے پر پہنچ سکتا ہے، جیسا کہ ایک دہائی قبل جنوبی سوڈان کے الگ ہونے کے وقت ہوا تھا۔

دوسری جانب سعودی عرب، مصر، قطر، ترکیہ اور اردن نے الفشر پر قبضے اور اس دوران پیش آنے والی سنگین انسانی حقوق کی خلاف ورزیوں اور قتلِ عام کی سخت الفاظ میں مذمت کی ہے۔

واضح رہے کہ سوڈان میں اپریل 2023 سے سوڈانی فوج اور منحرف فورس ریپڈ سپورٹ فورسز کے درمیان خونریز لڑائی جاری ہے، جس میں اب تک ہزاروں افراد مارے جا چکے ہیں۔