روہت شرما کا منفرد اعزاز: ون ڈے رینکنگ میں پہلی پوزیشن حاصل کرنیوالے عمر رسیدہ بیٹر بن گئے

دبئی: بھارتی کرکٹ ٹیم کے مایہ ناز بلے باز روہت شرما نے کپتان شبمن گل کو پیچھے چھوڑ کر آئی سی سی ون ڈے رینکنگ میں نمبر ون بیٹر کا اعزاز حاصل کرلیا۔

تفصیلات کے مطابق آئی سی سی کی جانب سے جاری  تازہ ترین ون ڈے رینکنگ میں روہت شرما  2 درجے ترقی پاتے ہوئے موجودہ کپتان شبمن گل کو پیچھے چھوڑ کر نمبر ون بیٹر بن گئے۔

روہت شرما پہلی بار آئی سی سی ون ڈے رینکنگ میں دنیا کے نمبر ون بیٹر بنے ہیں۔ 

رینکنگ میں دوسرا نمبر افغانستان کے ابراہیم زادران کا جبکہ تیسرا نمبر بھارتی کپتام شبمن گل کا ہے،چوتھی پوزیشن پر بابر اعظم براجمان ہیں۔

سابق بھارتی کپتان نے یہ کارنامہ 38 سال اور 182 دن کی عمر میں انجام دیا، یوں وہ ون ڈے رینکنگ میں نمبر ون بننے والے دنیا کے سب سے عمر رسیدہ بیٹر  بن گئے ہیں۔

خیال رہے کہ سڈنی میں آسٹریلیا کے خلاف تیسرے اور آخری ون ڈے میچ میں ناقابلِ شکست سنچری بنا کر انہوں نے بھارت کو 9 وکٹوں سے شاندار فتح دلائی  تھی جبکہ انہوں نے سیریز کے 3 میچوں میں 202 رنز بنائے۔

واضح رہے کہ آئی سی سی کی ون ڈے  بیٹرز رینکنگ میں دوسری پوزیشن افغانستان کے ابراہیم زادران کی ہے۔