کرم میں سیکیورٹی فورسز کا آپریشن، 7 خوارج ہلاک، کیپٹن سمیت 6 جوان شہید

خیبرپختونخوا کے ضلع کرم میں سیکیورٹی فورسز کی کارروائی کے دوران 7 خوارج مارے گئے، جبکہ کیپٹن سمیت 6 جوانوں نے جامِ شہادت نوش کیا۔

پاک فوج کے شعبہ تعلقاتِ عامہ (آئی ایس پی آر) کے مطابق، سیکیورٹی فورسز نے کرم کے علاقے دوگر میں بھارتی پراکسی فتنہ خوارج کے خلاف خفیہ اطلاع پر آپریشن کیا۔

آئی ایس پی آر کے مطابق، سیکیورٹی فورسز کی بروقت اور مؤثر کارروائی کے نتیجے میں 7 دہشت گرد ہلاک ہوگئے۔

تاہم، شدید فائرنگ کے تبادلے کے دوران کیپٹن نعمان سلیم سمیت 6 بہادر جوانوں نے جامِ شہادت نوش کیا۔
شہداء میں حوالدار امجد علی، نائیک وقاص احمد، سپاہی اعجاز علی، سپاہی محمد ولید، اور سپاہی محمد شہباز شامل ہیں۔

آئی ایس پی آر کے مطابق، کیپٹن نعمان سلیم ایک بہادر اور نوجوان میڈیکل آفیسر تھے، جو محاذِ جنگ پر میڈیکل خدمات کے ساتھ دلیرانہ انداز میں لڑے اور جامِ شہادت نوش کیا۔

ترجمان نے مزید بتایا کہ علاقے میں موجود دیگر بھارتی سرپرستی یافتہ خوارج کے خاتمے کے لیے کلیئرنس آپریشن جاری ہے۔

آئی ایس پی آر کا کہنا ہے کہ سیکیورٹی فورسز اور قانون نافذ کرنے والے ادارے ملک بھر میں انسدادِ دہشت گردی کی مہم پوری قوت سے جاری رکھے ہوئے ہیں، اور پاکستان سے بیرونی حمایت یافتہ دہشت گردی کے ناسور کا مکمل خاتمہ کیا جائے گا۔