اگر افغانستان نے جارحیت کی تو پاکستان کو حقِ دفاع حاصل ہے، بیرسٹر گوہر علی خان

چیئرمین پاکستان تحریک انصاف (پی ٹی آئی) بیرسٹر گوہر علی خان نے کہا ہے کہ اگر کوئی ملک پراکسی یا براہِ راست جنگ لڑنے کی کوشش کرے گا تو پاکستان کے ہر انچ کا دفاع کیا جائے گا۔ ان کا کہنا تھا کہ جیسے پاکستانی عوام اپنے وطن کے ساتھ کھڑے ہیں، پی ٹی آئی بھی پاکستان کے شانہ بشانہ کھڑی رہے گی۔

انہوں نے کہا کہ اگر افغانستان کی جانب سے کسی قسم کی جارحیت ہوئی تو پاکستان کو اپنے دفاع کا مکمل حق حاصل ہے، ہمارے پاس صلاحیت اور وسائل دونوں موجود ہیں۔

چیئرمین پی ٹی آئی کا کہنا تھا کہ جیسے ہم بھارت کے خلاف جنگ میں پاکستان کے ساتھ کھڑے تھے، اگر ایسی صورتحال دوبارہ پیدا ہوئی تو افغانستان کا معاملہ مختلف نہیں ہوگا۔

بیرسٹر گوہر علی خان نے کہا کہ پاکستان کے مفاد میں یہ ہے کہ ہم اپنے پڑوسی ممالک کے ساتھ پرامن تعلقات رکھیں، تاہم فی الحال افغانستان کی صورتحال کشیدہ ہے کیونکہ افغان طالبان کی پورے ملک پر رِٹ قائم نہیں۔

انہوں نے مزید کہا کہ ممکن ہے ترکیہ میں ہونے والے مذاکرات کامیاب نہ ہوں، مگر ہمیں کوشش جاری رکھنی چاہیے تاکہ معاملہ بات چیت کے ذریعے حل ہو۔
ان کے مطابق، پاکستان کو اپنے دوست ممالک کے ساتھ مل کر افغان طالبان کو سمجھانا چاہیے تاکہ خطے میں امن قائم رہ سکے۔

جب میزبان نے ان سے افغان رہنماؤں کے اسلام آباد پر حملے کے بیانات کے حوالے سے سوال کیا تو بیرسٹر گوہر نے کہا کہ اگر افغان طالبان ایسی باتیں کرتے ہیں تو ہم اس کی سخت مذمت کرتے ہیں۔
انہوں نے کہا کہ اقوامِ متحدہ کے چارٹر کے تحت پاکستان کو اپنے دفاع کا حق حاصل ہے، اور ہمیں چاہیے کہ اس معاملے کو افہام و تفہیم کے ذریعے حل کیا جائے۔